இந்தி எதிர்த்திட வாரீர் – பாரதிதாசன்
இந்தி எதிர்த்திட வாரீர்
இந்தி எதிர்த்திட வாரீர் — நம்இன்பத் தமிழ்தனைக் காத்திட வாரீர் (இந்தி)
முந்திய காலத்து மன்னர் நம்
முத்தமிழ் நாட்டினில் தொத்திடு நோய்போல்
வந்தவட மொழிதன்னை — விட்டு (5)
வைத்ததனால்வந்த தீமையைக் கண்டோம். (இந்தி)
செந்தமிழ் தன்னில் இல்லாத — பல
சீமைக் கருத்துக்கள் இந்தியில் உண்டோ?
எந்த நலம்செய்யும் இந்தி — எமக்கு
இன்பம் பயப்பது செந்தமிழன்றோ. (இந்தி) (10)
தென்னாடு தான்எங்கள் நாடு — நல்ல
செந்தமிழ் தான்எங்கள் தாய்மொழி யாகும்
புன்மைகொள் ஆரிய நாட்டை — எங்கள்
பொன்னாட்டினோடு பொருத்துதல் ஒப்போம். (இந்தி)
இன்னலை ஏற்றிட மாட்டோம் — கொல்லும் (15)
இந்தியப் பொதுமொழி இந்தி என்றாலோ
கன்னங் கிழிந்திட நேரும் — வந்த
கட்டாய இந்தியை வெட்டிப் புதைப்போம். (இந்தி)
-பாவேந்தர் பாரதிதாசன்
Comments
Post a Comment