Monday, April 29, 2019

தந்தை பெரியார் சிந்தனைகள்- முனைவர் ந. சுப்பு(ரெட்டியார்)

அகரமுதல

சென்னைப் பல்கலைக் கழகப் பேராசிரியர் சி. அ.பெருமாள்
அறக்கட்டளைச் சொற்பொழிவு – நாள்: 26.2.2001 முற்பகல்
‘தமிழ்ச்செம்மல்’ ‘கலைமாமணி’ 
பேராசிரியர் முனைவர் ந. சுப்பு(ரெட்டியார்)
தெற்கு தென்கிழக்கு நாடுகளின் மரபுவழிப் பண்பாட்டு நிறுவனம்
சென்னைப் பல்கலைக் கழகம்
தந்தை பெரியார்சிந்தனைகள்
தலைவர் அவர்களே!
அறிஞர் பெருமக்களே!
மாணக்கச் செல்வங்களே!
முனைவர் சி. அ.பெருமாள் அறக்கட்டளைச் சொற்பொழிவுத் திட்டத்தில் உங்கள் முன் நிற்கின்றேன். முனைவர் இரா. தாண்டவனிடமிருந்து அழைப்பு வந்ததும் எதைப்பற்றிப் பேச வேண்டும் என்பதுபற்றிச் சிந்தித்தேன். முடிவாக ‘தந்தை பெரியார் சிந்தனைகள்’ என்பதுபற்றிப் பேசலாம் என உறுதி கொண்டேன். என் மாணாக்கர் வாழ்வில்- நான் அறிவியல் மாணாக்கன்- என் சிந்தனையைத் தூண்டியவர்கள் எனக்குக் கணிதம், அறிவியல் கற்பித்த பேராசிரியப் பெருமக்கள் (1934-1939) நன்முறையில் அமைந்தமையால் அறிவியலில் முதன் வகுப்பு – கல்லூரியில் முதல்நிலை – மாநிலத்தில் மூன்றாம் நிலையில்- தேர்ச்சியடைய முடிந்தது. ஆனால் பொதுவாழ்வில் என் சிந்தனையைத் தூண்டி அது வளரக் காரணமாக இருந்தவர் தந்தை பெரியார்தான் என்பதை இன்றளவும் நீள நினைந்து பார்க்கின்றேன். ஆகவே அவரே எனக்குப் பேச்சுத்தலைப்பாக அமைந்தார். 1934-39 இல் நான் புனித சூசையப்பர் கல்லூரியில் பயின்றபோது திருச்சி நகரமண்டப (town Hall) திடலில் நடைபெறும் கூட்டங்களில் தந்தை பெரியார் அவர்கள் பேசும் பேச்சுகள் என் மனத்தை அதிகமாகக் கவர்ந்தன; தவறாமல் அவர்தம் பேச்சுகளை உன்னிப்பாகக் கேட்டு வந்தேன். அவை யாவும் இளைஞர் மனத்தை ஈர்க்கக் கூடியனவாக அமைந்திருக்கும்.
இந்த அறக்கட்டளை நாயகராக இருக்கும் முனைவர் சி. அ. பெருமாள் அவர்களை 1975 முதல் அறிவேன். நான் திருப்பதியில் பணியாற்றியபோது இப்பெருமகனாரும் இவர்தம் கெழுதகை நண்பர் (மாநிலக் கல்லூரி முதல்வர்) திரு. சே.. இராமசந்திரன் அவர்களும் திருப்பதிக்கு வருவார்கள். என் இல்லத்திற்கருகில் குடியிருந்த (அரசியல் துறை பேராசிரியர்) முனைவர் கே. கமலநாதன் இல்லத்திற்கு வருவர். பேசி அளவளாவுவோம். அப்பொழுதே இருவரும் துணை வேந்தர்களாக உயர்வர் என என் மனம் எண்ணியதுண்டு. ஒருவருக்கு அந்த வாய்ப்பு கிடைத்தது; மூன்றாண்டு மதுரை-காமராசர் பல்கலைக்கழகத்தில் துணைவேந்தராகப் பணியாற்றினார்.
நண்பர் முனைவர் சி. அ.பெருமாள் அவர்கட்கு அந்த வாய்ப்பு வரவில்லை; அஃது அவருக்கு இழப்பு ஒன்றுமில்லையாயினும், அவர்தம் சீரிய கல்விப் பணியைத் தமிழர்கள் இழந்தனர். முனைவர் பெருமாள்ஒரு பெரிய சிந்தனையாளர் என்பதற்கு அவர் கொணர்ந்த ‘மதிப்பியல் பேராசிரியர் திட்டம்’ ஒன்றே சிறந்த சான்றாக அமைகின்றது. இத்திட்டம் உண்மை உழைப்பாளர்கட்குத் தொடர்ந்து பணியாற்ற வாய்ப்பு தருகின்றது. அத்திட்டத்தில்தான் அடியேன் (தமிழ் இலக்கியத்துறையில்) ‘வாழ்நாள் மதிப்பியல் பேராசிரியராகப்’ பணியாற்றுகிறேன். முனைவர் (பிஎச்டி) ஆய்வு மாணாக்கர் மூவருக்கு வழிகாட்டியாக இருக்கலாம் என்ற வாய்ப்பும் பல்கலைக்கழகம் தந்துள்ளது. ஆசிரியப் பெருமக்கள் இருவர் ஆய்ந்து வருகின்றனர். முனைவர் சி. அ.பெருமாளும் மதிப்பியல் பேராசிரியராகப் பணியாற்றி வருகின்றார்; மாணாக்கர் உலகத்தில் சிறந்த செல்வாக்குடன் திகழ்கின்றார். 1983-இல், இவர் துணைவேந்தராக வந்திருந்தால் பல்கலைக்கழகம் பல்வேறு திசைகளில் முன்னேற்றம் கண்டு திகழ்ந்திருக்கும் என்பது என் கருத்து. இஃதுடன் இஃது நிற்க.
தந்தை பெரியார் சிந்தனைகளை மூன்று தலைப்புகளில் (1) கடவுள்,சமயம்பற்றிய சிந்தனைகள் (2) சமூகம்பற்றிய சிந்தனைகள் (3) மொழிபற்றியசிந்தனைகள் என்று மூன்று நாள் பேசத் திட்டமிட்டுள்ளேன். இதற்கு நல்ல ஏற்பாடுகள் செய்த அண்ணா வாழ்வியல் மையத் துறைத்தலைவர்பேராசிரியர்முனைவர் இராதாண்டவன்  அவர்கட்கு மிக்க நன்றி.
1. கடவுள் சமயம் பற்றிய சிந்தனைகள்
முதற்பொழிவாக இந்தத் தலைப்பில் பேசத் தொடங்குவதற்கு முன் தந்தை பெரியாரைப்பற்றி அறிமுகமாகச் சில கூறுவேன்.
(1) இலக்கண நூற்பாபோல் பாவேந்தர் பாரதிதாசனின் அறிமுகம் இது!
அவர்தாம் பெரியார் 
அன்பு மக்கள் கடலின் மீதில் 
அறிவுத் தேக்கம் தங்கத் தேரில்
மக்கள் நெஞ்சில் மலிவுப் பதிப்பு 
வஞ்ச கர்க்கோர் கொடிய நெருப்பு 
மிக்க பண்பின் குடியி ருப்பு 
விடுத லைப்பெரும் படையினர் தொகுப்பு! 

தில்லி எலிக்கு வான்ப ருந்து 
தெற்குத் தினவின் படைம ருந்து 
கல்லா ருக்கும் கலைவி ருந்து 
கற்ற வர்க்கும் வண்ணச் சிந்து! 

சுரண்டு கின்ற வடக்க ருக்குச் 
சூள்அ றுக்கும் பனங்க ருக்கு ! 
மருண்டு வாழும் தமிழ ருக்கு 
வாழ வைக்கும் அருட்பெ ருக்கு ! 

தொண்டு செய்து பழுத்த பழம்; 
தூய தாடி மார்பில் விழும்; 
மண்டைச் சுரப்பை உலகு தொழும்; 
மனக் குகையில் சிறுத்தை எழும்! 

தமிழர் தவம் கொடுத்த நன்கொடை 
தன்மானம் பாயும் தலை மேடை.[குறிப்பு 1]
பாவின் சொல், சொற்றொடரின் பொருள் ‘பொரி மத்தாப்பு போல் சீறி எழுவதைக் கண்டு மகிழலாம்; அந்த ஒளியில் தந்தை பெரியாரின் உருவத்தை மானசீகமாகவும் காணலாம்.
(தொடரும்)
[குறிப்பு 1. பாரதிதாசன் கவிதைகள்]

Sunday, April 28, 2019

தமிழர் வாழ்வுக்கு ஊன்றுகோல் பாரதிதாசன் – கவிஞர் நாகூர் காதர் ஒலி

அகரமுதல

தமிழர் வாழ்வுக்கு ஊன்றுகோல் பாரதிதாசன்

மூவேந்தன் வளர்த்த முதிர்கனித் தமிழை உண்டு
நாவேந்தன் தானாகி நாளெல்லாம் பாட்டெழுதி
காவேந்தன் மணமாகி கவிதைகள் பலப்பாடி
பாவேந்தன் எனப் பேர்பெற்ற பாரதிதாசன்

புதுவையில் உதித்த புதியதோர் விடியல்
பூந்தமிழுக்குக் கிடைத்த பொற்குவிப் புதையல்
எதுகையில் மோனையில் இசையிடும் தென்றல்
ஏழ்மையில் திகந்த தூய்மையின் திங்கள்

சித்திரை மாதத்தில் ஊறும் கனலூற்று
செந்தமிழ்ச் சொல்லாய் சீறும் அனல்காற்று
முத்திரைப் பதித்த கதிரின் ஒளிக்கீற்று
முற்போக்குச் சிந்தையில் வேதியல் வீச்சு

வாத்தியார் பணியில் வாழ்வேணி ஏறியவன்
ஆத்திகனாய் முப்பதாண்டு ஆற்றலுடன் வாழ்ந்தவன்
நாத்திகம் பேசியே நாத்தழும் பேறியவன்; சமூக
நாற்றங்களை நடுத்தெருவில் நிற்கவைத்துச் சாடியவன்

வாழ்ந்ததோ எழுபத்து மூன்று ஆண்டுகள்
வரைந்ததோ எழுபத்து இரண்டு நூல்கள்
வாழ்க்கையில் விளைத்தது அளப்பரிய சான்றுகள்; தமிழர்
வாழ்வுக்கு வையத்தில் அவனும் ஓர் ஊன்றுகோல்!
கவிஞர் நாகூர் காதர் ஒலி,
வைரத்தூறல் – கவிதைத் தொகுப்பு

தன்னேரிலாத தமிழ் – பாரதிதாசன்

அகரமுதல


தன்னேரிலாத தமிழ்

தன்னேரிலாத தமிழ் அன்னையே-உனை வாழ்த்தினேன்
இன்னல் தவிர்த்தாள் என்னையே         தன்னேரிலாத…..
முன்னைத் தோன்றிய மக்கள் முதன்முதல் பேசிய
மொழியே! மொழியே! மொழியே!, எனவே வாழ்த்தும்,
                                  தன்னேரிலாத…..
தென்னவன் சேரன் சோழன் செம்மையிலே வளர்த்த
திருவே! திருவே, திருவே புகழ் மிகுந்த
மன்னும் குமரிமுதல் பனிமலை மட்டும் வாழ்ந்த
வாழ்வே! வாழ்வே வாழ்வே எனவே வாழ்த்தும்,
                               தன்னேரிலாத…..
ஆரியர் எதிர்ப்புக்கும் அசையாமல் வாழும் எங்கள்
அன்பே! அன்பே,அன்பே புகழ் மிகுந்த
சீர்பெறு முத்தமிழே தெவிட்டாத புத்தமிழ்தே
செல்வி! செல்வி, செல்வி எனவே வாழ்த்தும்.
                               தன்னேரிலாத…..
முதன்முதல் செந்தமிழ் நான்மறை செப்பிய
முத்தே! முத்தே, முத்தே புகழ்மிகுந்த
புதுவாழ்வு காட்டிடும் திருக்குறள் பூத்தபூம்
பொழிலே! பொழிலே, பொழிலே எனவே வாழ்த்தும்,
                               தன்னேரிலாத…..
புரட்சிக்கவிஞர் பாரதிதாசன்

Wednesday, April 24, 2019

சி.இலக்குவனாரின் தமிழ்ப்பணிகள் – ஓர் ஆய்வு 1/3: முனைவர் இரா.வேல்முருகன்

அகரமுதல

சி.இலக்குவனாரின் தமிழ்ப்பணிகள்

–  ஓர் ஆய்வு 1/3

[அண்மையில் மறைந்த பேராசிரியர் முனைவர் இரா.வேல்முருகன் அவர்களுக்கு அஞ்சலி செலுத்தும் வகையில் இக்கட்டுரை வெளியிடப்பெறுகிறது.
திருநெல்வேலி மதுரை  திரவியம் தாயுமானவர் இந்துக்கல்லூரி, வெ.ப.சு.தமிழியல் ஆய்வு மையம், இலக்குவனார் இலக்கிய இணையம்  இணைந்து திருநெல்வேலி ம.தி.தா. இந்துக்கல்லூரியில்  மாசி 12,13,14 தி.பி 2045 (பிப் 24,25,26.2014) ஆகிய  நாள்களில் நடத்திய இலக்குவனார் முப்பெருவிழாவில், ‘முனைவர் சி.இலக்குவனார் தமிழ்ப்  பணிகள்’ குறித்த பன்னாட்டுக் கருத்தரங்கத்தில் அளிக்கப் பெற்ற கட்டுரை. 3 பிரிவாகப் பகுக்கப்பெற்று வெளியிடப் பெறுகிறது.]

      தமிழ் கூறு  நல்லுலகம்  ஈன்றெடுத்த  தவப் புதல்வர்களுள் வாழ்வாங்கு வாழ்ந்து  தமக்கெனத் தனிமுத்திரை பதித்த வித்தகர்  முனைவர் சி.இலக்குவனார் அவர்கள்.
        தோன்றிற் புகழொடு  தோன்றுக அஃதிலார்
        தோன்றலிற்  தோன்றாமை நன்று
என்ற வள்ளுவப் பெருந்தகையின் வாக்கிற்கு ஏற்பக் கல்வி உலகில் அழியாப் புகழோடு வாழ்ந்த பெருந்தகை.
       தொண்டு செய்வீர் தமிழுக்குத்
       துறைதோறும்  துறைதோறும் துடித்தெழுந்தே!
என்ற பாரதிதாசனின்  முழக்க வரிகளைத் தலைமேற் கொண்டு பல்துறை வித்தகராகப் பவனிவந்தவர்.  அவரது அரும்பெரும் படைப்புகளுள்  சிறப்பிடம்  பெற்றுத் திகழும்  ‘பழந்தமிழ்’  எனும் படைப்பில்  காணப்படும் அருமை பெருமைகளை ஆய்வு நோக்கில்  வெளிக் கொணர்வரே இக்கட்டுரையின் தலையாய நோக்கமாகும்.
          பேராசிரியரின் தாய்மொழிப்பற்று எத்தன்மைத்து என்பதைப் ‘பழந்தமிழ்’  எனும் நூலுக்கு அவர் எழுதிய முன்னுரையில்,
      “வேற்றுமொழியைக் கற்கும்  நாம், நம் மொழியை மறவாது அதன் வளத்திற்கு வேற்றுமொழி அறிவைப் பயன் படுத்த வேண்டும்.  பிறநாட்டு நல்லறிஞர் சாத்திரங்கள்  தமிழ் மொழியிற் பெயர்த்தல் வேண்டும்.இறவாத புதுநூல்கள்  தமிழ்மொழியில்  இயற்றல் வேண்டும் .  இரண்டும் செய்திலோம்.  அன்றியும் உள்ளுவதும் உரையாடுவதும் வேற்று மொழியிலேயே நிகழ்த்தினோம்.  ஆகவே நமக்கென ஒரு மொழி இல்லை என்று பிறநாட்டவர்  எண்ணுமாறு நடந்துவிட்டோம்”
எனத்  தமிழ் மொழியைப் புறந்தள்ளும் தமிழர்களுக்கு விழிப்பு உணர்வைஏற்படுத்துகின்றார்.  தமிழ் மொழி காலம் காலமாக அதன் சீரிளமை குறையாமல் வாழ்ந்து கொண்டிருப்பது இவர் போன்ற தமிழ்ப் பற்றாளர்களால்தான்.
   பேராசிரியரின் மொழிநடை தெளிந்த நீரோடை போன்றது.  கூறவரும் கருத்துகளை  ஆணித்தரமாகக் கூறும்  பண்பு இவரைப் புகழின் உச்சிக்கே கொண்டு சென்றது எனில் மிகையில்லை. தம் வாழ்நாள்  முழுவதும் தமிழ்ப்பணி ஆற்றுவதிலும்  உலக அரங்கிலே தமிழனையும், தமிழையும்தலைநிமிரச் செய்வதிலுமே காலத்தைக் கழித்தவர்.  பன்மொழிப் புலமை சிறப்பாகப் பெற்றிருந்ததும்  இறுமாப்பு எதுவுமின்றி  ‘என் கடன்  பணி செய்து கிடப்பதே ’ என வாழ்ந்த பெருந்தகையார்.
       தமிழுக்குத் தொண்டு செய்த  மேலை நாட்டு அறிஞர்களை –    ‘ தமிழும் அதன் கிளை மொழிகளும்  தனிக்குடும்பத்தைச் சார்ந்தன.  தமிழ்  வேறு ; ஆரியம் வேறு; தமிழ் ஆரிய மொழியின சிதைவு மொழிகளுள்  ஒன்றன்று’ என்று நிலை நாட்டிய பேரறிஞர் கால்டுவெல் அவர்களின்  தொண்டினை – நாம்  என்றும்  போற்றுதற்குரியோம்  என வாயாரப் புகழ்கின்றார்.  கால்டுவெல், சீ.யு.போப்,  ஈராசு. பாதிரியார்  போன்ற பல்வேறு அறிஞர்களின்  நூல்களைக் கசடறக் கற்று அவர்களின்  தமழ்த் தொண்டினைப் புகழும் தமிழ்ப் பண்பாளர்  இவர்.
         இவரது  ‘பழந்தமிழ்’   எனும்  நூலில்  1)மொழியின் சிறப்பு,  2) மொழிகளும் மொழிக் குடும்பங்களும், 3)பழந்தமிழ் 4) மொழி மாற்றங்கள்  5) பழந்தமிழ்ப் புதல்விகள்  6) பழந்தமிழ் இலக்கியம், 7) பழந்தமிழ் நிலை  8) பழந்தமிழின்  எழுத்துச் சான்றுகள்  9) பழந்தமிழ் : சொல் அமைப்பு 10) பழந்தமிழும் தமிழரும் 11) தமிழ் மறுமலர்ச்சி எனப் பதினோறு தலைப்புகள் ஆய்வு செய்யப்பட்டுள்ளன,
       மொழியின்  சிறப்பை  விளக்க வந்த பேராசிரியர், மொழி என்பது மொழியப்படுவது; வாயால்  மொழிந்து காதால் கேட்கப்படுவது என்றும் மொழி என்று தமிழர்கள் பெயரிட் டுள்ளமை மிகவும் பொருத்தமுடையதாகும் என்றும் Language என்ற சொல்லுக்கு  நாவால்  உண்டாக்கப்படுவது என்று பொருளாகும் என்றும் விளக்கம் கொடுத்திருப்பதன் மூலம் மொழியை அறிவியல் முறைப்படி அணுகியிருப்பது  புலனாகிறது.
         மொழியின் தோற்றம் பற்றித் திட்டவட்டமாகக் கூற இயலாவிடினும் தமிழ் மொழி உலகில் முதன் முதலில் தோன்றி யிருக்க வேண்டும்  என்பதற்கு  அடையாளமாக ‘அம்மா’  என்று மக்களுடன்  நெருங்கிப் பழகும் விலங்குகளாம்  பசுவும்  எருமையும் ஆடும் கூப்பிடக் காண்கிறோம்.  தமிழில்தான்  அம்மா எனும் சொல் முழு உருவுடன்  ஒலிக்கப்படுகின்றது.  ஆதலின்  ‘தமிழே இயற்கையை ஒட்டி எழுந்த உலக முதன் மொழி என்று கூறுதல் சாலும்’  என்ற கருத்து தமிழே முதன் மொழி என்பதற்கு வலுச் சேர்ப்பதாக அமைகின்றது.
           கல்தோன்றி மண்தோன்றாக் காலத்திற்கு  முன்பே  தோன்றியது தமிழ் என்றும்  எமனோ மற்றும்  பர்ரோ போன்ற பேரறிஞர்களின் கூற்றிற்கேற்பவும்,  ‘ஒப்பிலக்கணத்தின் தந்தை’ எனப் போற்றப்பெறும்  கால்டுவெல்  அவர்களின்  கூற்றிற்கேற்பவும் மூலத்திராவிட மொழியாகத் தமிழ் மொழியே இருந்தது என்ற நிலையிலும்,  மொகஞ்சதாரோ அரப்பா போன்ற இடங்களில் அகழ்வாய்வின் மூலம்  தோண்டி எடுக்கப் பட்ட பானை ஓடுகளில் தமிழ் எழுத்துகள்  பொறிக்கப் பட்டிருந்தன என்ற நிலையிலும் தமிழே உலகத்தின் முதல் மொழி எனக் கருதுவதில்  எள்ளளவும் ஐயமில்லை.
(தொடரும்)
முனைவர் இரா.வேல்முருகன், முனைவர் இரா.வேல்முருகன், சிங்கப்பூர்