புகை இல்லாத புகைவண்டி – சின்னா சர்புதீன்

இலக்குவனார் திருவள்ளுவன்      16 August 2015      No Comment

புகை இல்லாத புகைவண்டி

ச்சுக்குச்சுக்கு ச்சுக்குச்சுக்கு ச்சுக்குச்சுக்கு ச்சூ

ச்சுக்குச்சுக்கு ச்சுக்குச்சுக்கு ச்சுக்குச்சுக்கு ச்சூ

இரும்புக்கம்பி இரண்டிலமர்ந்து

  எதிர்த்திசையை நோக்கியே

விரைந்துசெல்லும் வண்டியைப்பார்

  வீறுகொண்டு பறக்குதே

நீண்டுநெடுங் தூரம்ஓடி

  நிற்குமிடம் தன்னிலே

மீண்டும்மக்கள் தம்மைஏற்றி

  மிகவிரைவாய்ச் செல்லுமே

புகையிரதம் எனஇதற்குப்

  பெயரிட்டார்கள் முன்னராம்

புகைவராத இன்றும் அது

  புகையிரதம் தானடா

ஆடுமாடு மனிதர் பொருள்

  அத்தனையும் சுமக்குமாம்

வீடுபோன்ற அறைகள்பல

  வரிசையாக இருக்குமாம்

காடுமேடு வயல்நிலங்கள்

  கடல்கடந்தும் போகுமாம்

நாடிரண்டை மூன்றைத்தொடுத்து

  நீண்டபயணம் செல்லுமாம் !

( இலங்கை சின்னா சர்புதீன் எழுதிய ‘எங்கள் உலகம்’ – சிறுவர் பாடல்கள் எனும் நூலிலிருந்து )

– முதுவை இதாயத்து

அகரமுதல 92 ஆடி 31, 2046 / ஆக.16, 2015