பிறக்காத தமிழ்க் குழந்தைக்கு …. : க.சச்சிதானந்தன்

அகரமுதல 144, ஆடி 09, 2047 / சூலை 24, 2016

இலக்குவனார் திருவள்ளுவன்      24 சூலை 2016      கருத்திற்காக..

பிறக்காத தமிழ்க் குழந்தைக்கு

அளவிலாத காலமென்னும்
அலையின் மீது அலைகளாய்
அழிவிலாது தோன்ற நிற்கும்
அமரனான பாலனே

உரிமை கேட்டு உடைமை கோரி
உலகமெங்கும் போற்றவே
தருமமென்ற நெறியின் போரில்
தமது மண்டை யுடையவே

ஒழுகி வந்த இரத்த ஆற்றில்
உதய மாகிக் கன்னியர்
பழகு பாடற் கருவிலாகும்
பாலனே என் செல்வமே

கட்டு மீறி உரிமை நாதக்
கனல் பிறக்கும் குரலிலும்
சொட்டு கின்ற வியர்வை மீதும்
தோன்று கின்ற பாலனே

மனது தோறும் எழுதி வைத்த
மான மென்னும் முத்திரை
எனது சொந்தக் கடித சேவை
என்று மாறி நின்றதும்

முடிவிலாத வரிசை யாக
முழுதும் நின்று வீற்றதும்
மடிவிலாத உனது சொந்த
மானங் காக்க வல்லவோ

அவசரத்துச் சட்ட நாளில்
அடியும் மிதியும் பட்டதும்
தவமிருந்த தாயர் தந்தை
தலையுடைந்து போனதும்

மனவுரத்தில் உயிர்கொடுத்து
மண்ணின் மீது சாய்ந்ததும்
எனது பிள்ளை அடிமை நீங்கும்
என்ற நினைவில் அல்லவோ

(1961இல் தமிழர் நடத்திய அறப்போராட்டம் முறியடிக்கப்பட்டபோது).

மதுரைப் பண்டிதர் க.சச்சிதானந்தன்

ஈழம்

ஆனந்தத் தேன்