கவிஞர் முடியரசனின் பூங்கொடி : 62 : பொன்னியின் செயலறு நிலை
(கவிஞர் முடியரசனின் பூங்கொடி : 61 : தந்தையின் சீற்றம்- தொடர்ச்சி)
பூங்கொடி
பொன்னியின் செயலறு நிலை
இந்நினை வதனால் ஏங்கி மெலிவது
கண்டனன் தந்தை; கடிதினில் இவள்மணம் 50
கண்டமை வேன்எனக் கொண்டுளங் கருதி
முயல்வுழி, இச்செயல் முழுவதும் உணர்ந்த
கயல்விழி இரங்கிக் கண்ணீர் மல்கிச்
செயலறக் கிடந்தனள் மயலது மிகவே;
பொன்னி காதலனிடம் செய்தி கூறல்
இனைந்துயிர் மாய இடங்கொடா ளாகி 55
நினைந்தொரு முடிவு நேர்ந்தனள் மனத்தே;
விடிந்தால் திருநாள் விரைவினில் அனைத்தும்
முடிந்தே எழுவேன் என்மனம் முடுகும்
தையற் றொழில்வலான் தாளென இரவில்
தையல் மலரடி விரைந்தன தனிமையில்; 60
வல்லவன் காதலன் வதியிடன் குறுகி
வில்லவன் றன்பால் நிகழ்ந்தன விளம்பலும்;
வில்லவன் புலம்பல்
`அந்தோ! நின்னை அயலவன் மணஞ்செயின்
நொந்தே சாவேன் நொடிப்பொழு தினியிரேன்
இந்த உரைசொல வந்தனை யோ’என 65
வெந்துழல் மனத்தினன் வில்லவன் புலம்ப,
பொன்னியின் துணிபு
`உயிரனை யாய்!நீ உணரா துரைத்தனை!
துயரம் விட்டொழி! துணைவன் நீயே
அயிரேல்! நின்னை அடையே னாயின்
—————————————————————
முடுகும் – விரையும், அயிரேல் – ஐயப்படாதே.
++++++++++++++++++++++++++
கயிறே துணையெனக் கருத்தினிற் கொண்டுளேன்’ 70
என்றனள் பொன்னி; இவ்விடை கேட்டு,
வில்லவன் எழுச்சி
`நன்றுரை புகன்றனை! நமக்கேன் சாவு?
வென்றுல காள்வோம்; வீணரை எதிர்ப்போம்;
நினைப்பெறின் உலகை நினையேன் மதியேன்;
முனைத்தெழு பகையை முறிப்பேன் சிரிப்பேன்; 75
நின்னுளம் யாதோ! என்னுளம் வாழ்வோய்!
(தொடரும்)
கவிஞர் முடியரசன், பூங்கொடி
Comments
Post a Comment