குடிப்பீரா உழவனின் கண்ணீர்? – ஆரூர் தமிழ்நாடன்

அகரமுதல 185,  சித்திரை 24, 2048 /  மே 07, 2017

இலக்குவனார் திருவள்ளுவன்      07 மே 2017      கருத்திற்காக..

குடிப்பீரா உழவனின் கண்ணீர்? 

அதிகார மேடையில் சதிராடும் பேய்களே
அநியாயம் செய்யலாமா? – உங்கள்
அலட்சிய வேள்விக்கு வேளாண் தோழர்கள்
விறகாக எரியலாமா?

விதியற்றுக் கதியற்று உழவனும் துயரிலே
வெந்துபோய்க்  கதறலாமா? -எங்கள்
வேளாண் தோழர்கள் படும்பாட்டை இன்னமும்
வேடிக்கை பார்க்கலாமா?

நதிநீரைக் கேட்பதும் கடன்நீக்கச் சொல்வதும்
நாட்டோரின்   உரிமைதானே! -தீய
நரிகளே உழவனின் கண்ணீரைக் குடிக்கவா
நாற்காலி ஏறினீர்கள்?

சதிகாரக் கும்பலே கதியற்ற உங்களைச்
சடுதியில் விரட்டுவோமே! -சற்றும்
வெட்கமே இல்லாத வேதாந்தக் கூட்டமே
விரட்டியே துரத்துவோமே!

– ஆரூர் தமிழ்நாடன்