தேராச் செய்வினை தீராத இன்னல் தரும் ! – பழ.தமிழாளன்
தக்கவர்க்கு வாக்களிப்பீர்
தேராச் செய்வினை தீராத இன்னல் தரும் !
1
சீரார்க்கும் எண்ணமுடன் திகழ்கதிராம்
எழுச்சிநிறை உணர்வே பெற்றுச்
செந்தமிழை இனம்நாட்டை நெஞ்சகத்தே
வைப்பவரைத் தேரல் வேண்டும் !
தேராதே கட்சியையும் தேர்தலிலே நிற்ப
ரையுந் தேர்ந்தெ டுத்தால்
தீராத இன்னலையே இருகையால்
வணங்கியுமே அழைத்தல் ஒக்கும் !
கூரான வாளெடுத்துக் கூடியுள்ள தம்முயி
ரைச் செகுத்தல் போல
குடியாட்சி மாண்பழிக்கும் கட்சிக்கே
வாக்கினையே அளிப்போ மாயின்
ஏரார்த்த தமிழ்மரபும் எழிற்றமிழும் பண்
பாடும் நாடும் வீழும் !
என்றென்றும் தமிழறமும் இனமொழியும்
நிற்கதமிழ்ப் பற்றார் தேர்க !
2.
தேர்தலுமே வந்துவிட்டால் திருக்குறளைச்
செந்தமிழைக் காப்பார் போல
தேராதே நெஞ்சகத்தில் திகழ்கின்ற
உதட்டினிலே ஒட்ட வைப்பர் !
பார்முதலாம் செந்தமிழைப் பரப்புதற்கே
ஆக்கமதை ஆளும் போது
பணமொதுக்கித் திட்டமிடும் எண்ண
மில்லார் கூறுவதும் பொய்யே பொய்யே!
சீர்தூக்கிப் பார்த்தாலே செப்புகின்ற
அத்தனையும் முரணே ஆகும் !
தன்மானம் பகுத்தறிவு தன்னிரண்டு
கண்ணென்னும் தமிழ ரெல்லாம்
தேர்தலுரை அத்தனையும் சேர்ந்தொன்றிச்
செயலாற்றும் உரையாய்க் கொள்ளார்
தேர்தலிலே உரைத்தவற்றை இதற்குமுன்
னே செய்தாரா ? ! தீயே ! ஒப்பார் !
புலவர் பழ.தமிழாளன்,
இயக்குநர்—பைந்தமிழியக்கம், திருச்சிராப்பள்ளி
Comments
Post a Comment