கவிஞர் முடியரசனின் பூங்கொடி : 72 : தங்கத் தேவன் கொதிப்புரை
(கவிஞர் முடியரசனின் பூங்கொடி : 71 : ஏமகானன் பாராட்டுரை-தொடர்ச்சி)
பூங்கொடி
தங்கத் தேவன் கொதிப்புரை
`வடபுலப் பெரியோய்! வாட்டம் தவிர்தி!
வடமொழி வெறுத்து வழுத்தமிழ் கோவிலில்
இடம்பெற முயலும் இழிமகன் செருக்கினை
அடக்கிட அழைத்தேன், கோவிலில் தமிழ்புகல்
விடத்தகு செயலோ? தடுத்திடல் வேண்டும்; 145
மந்திர மொழியை வடமொழி தவிர்த்துச்
செந்தமி ழாற்சொலின் செத்து மடிகுவர்;
கோவிலைத் தொலைக்கஇக் குறுமகன் இப்பணி
மேவினன் போலும், மிடுக்கினைத் தொலைப்போம்;
தேவ பாடையின் சிறப்பினை நாட்டுவோம்; 150
யாவரும் என்பெயர் கேட்டால் நடுங்குவர்,
பிறப்பால் இழிந்தோன் எதிர்த்துனைப் பேசினன்!
இறப்பே அவன்இனி எய்துதல் வேண்டும்’என்
றழுக்கா றுள்ளம் அயலவன் சினமும்
இழுக்குறு செயல்செய எழுந்தன; ஒருநாள் 155
—————————————————————
குறுமகன் – சிறியவன், தேவபாடை – ஆரியமொழி.
++++
மீனவன் தாக்குறலும் – வேறிடம் சேறலும்
அருகமை சிற்றூர் ஆண்டு விழாவில்
பெருமழை என்னச் சொன்மழை பொழிந்து
வருமவன் மீனவன் வண்டியை இருளில்
ஊர்க்குறு மாக்கள் தாக்கினர்; அவனைத்
தீர்த்திட எண்ணித் தீட்டிய வாளால் 160
வெட்டினர்; ஆனால் விளைந்தது வேறு!
கட்டிளங் காளையர் தட்டுவண்டி யோட்டிக்
கொட்டி முழக்கிக் கூஉய்வரல் கேட்டு
விட்டுவிட் டோடினர் விலங்குச் செயலோர்;
வந்த காளையர் வாரி யணைத்து 165
நொந்த உடலின் நோவினை அகற்றிக்
கூடல் நகரிற் கொண்டுய்த் தனரே;
`வேடன் கட்படு வெண்புற வானேன்!
பாடும் தமிழைப் பரப்புதல் பழியோ?
கூடி எங்கும் கொலைசெய் மாக்கள் 170
தேடி அலையத் தொடங்குதல் கண்டேன்;
காடும் நாடும் ஒன்றெனக் கண்டேன்;
உயிர்ப்பலி உறுதி, ஓரிடம் தரியேன்;
செயிர்த்தோர் என்னைச் செகுத்தொழிக் காமுனம்
ஊரூர் ஓடி உயரிசை பரப்பிப் 175
பாரோர் ஏற்கப் பணிபுரிந் தழிவேன்’ என்றம் மீனவன் ஏகினன் விரைந்தே;
(தொடரும்)
கவிஞர் முடியரசன், பூங்கொடி
Comments
Post a Comment