கவிஞர் முடியரசனின் பூங்கொடி : 71 : ஏமகானன் பாராட்டுரை
(கவிஞர் முடியரசனின் பூங்கொடி : 70 : மீனவன் சங்கம் புகுதல்-தொடர்ச்சி)
பூங்கொடி
ஏமகானன் பாராட்டுரை
திசைதொறும் சென்று தன்புகழ் நிறீஇ
விருதுபல கொண்டு வெற்றிக் களிப்பொடு
வருவோன் ஒருவன் வடபுலத் திசைவலான்
ஏம கானன் எனும்பெயர் பூண்டோன் 105
தோமறு மீனவன் தொண்டும், தமிழிசைப்
புலமையும், அவன்பெரும் புகழும் செவிமடுத்துக்
கலைமலி காளையின் கண்முன் தோன்றி
`உரவோய்! இளமையில் ஒருதனி நின்றே
இரவாப் பகலாத் திறமுடன் ஆற்றும் 110
நின்னிசைப் பணிக்கு நெடிதுவந் தனனே,
என்னிசைப் பயிற்சியும் எளிதாய் நினக்கு
வருமா றுரைக்க மனங்கொண் டுன்பால்
வருதல் உற்றேன்; வடபுலத் திசையும்
ஒருங்குடன் சேரின் ஒளிரும் நின்புகழ்; 115
அருங்குணம் ஆன்றோய்! விரும்புதி யோ’என,
மீனவன் ஏளனம்
வயிறுபுண் ணாக வாய்விட்டுச் சிரித்துக்
`குயிலின் குரலொடு கோழியின் குரலும்
இணையின் என்னாம்? இந்நாள் வரையும்
துணைவிழி மூடித் தூங்கிய மாந்தர் 120
கண்விழித் தெழுந்து கருத்துடன் தமிழிசைப்
பண்தொடுத் திசைக்கப் பயிலுங் காலை
மீட்டும் மற்றோர் இசைபுக விழையின்
காட்டும் ஆர்வம் கருகிச் சாகும்;
அரும்பிய ஆர்வம் அணிமல ராகி 125
விரிந்து நறுமணம் வீசுதல் ஒன்றே
என்குறிக் கோள்’என எடுத்துரைத் தனனே;
—————————————————————
விருது – பட்டம், பரிசு; செவிமடுத்து – கேட்டு, உரவோய் – அறிஞ!
+++
தங்கத் தேவனிடம் ஏமகானன் முறையிடல்
மின்பொறித் தாக்குதல் மெய்யுற் றான்போல்
பின்புறம் நோக்கிலன் பேசா நாவினன்
ஏகினன் வடபுல ஏம கானன்; 130
போகிய அவ்விசைப் புலவன் தானுறை
தங்கத் தேவன் தன்மனை குறுகிச்
`சிங்கம் என்னையிச் சிறியோன் பழித்தனன்;
என்னிசை இகழ்ந்து தன்னிசை புகழ்ந்தனன்
நின்னுரை கேட்டேன் நெளிந்ததென் மானம்! 135
எந்நகர்ச் செலினும் எற்பணிந் தேற்றனர்;
இந்நகர் ஒன்றே இகழ்வுரை தந்தது;
தங்கத் தேவ! தலைகவிழ் நிலையில்
தொங்கச் செய்தனை! துளைத்தனை நெஞ்சம்’
செங்கண் சிவக்கச் செப்பினன் இவ்வணம்; 140
(தொடரும்)
கவிஞர் முடியரசன், பூங்கொடி
Comments
Post a Comment