தக்காரைப் போற்று! – மு.பொன்னவைக்கோ
அகரமுதல
தக்காரைப் போற்று!
தக்காரை நெஞ்சாரப்
போற்ற வேண்டும் – ஆற்றல்
மிக்காரை அரியணையில்
ஏற்ற வேண்டும்.
தமிழ் காக்கும் நல்லோரைக்
காக்க வேண்டும் – அதுவே
தமிழ் வளர நாமாற்றும்
சேவை யாகும்.
தமிழென்றும் தாழ்வின்றி
தழைக்க வேண்டும் – அந்தத்
தமிழ்ச் சேவை செய்துஉயிர்
வாழ வேண்டும்.
எக்காலும் இந்நோக்கில்
மாற்றம் இன்றி – வாழ்வில்
ஏற்றமுடன் பணியாற்றும்
ஆற்றல் வேண்டும்
என்றெம்மை ஈன்றவளை
என்றும் போற்றி – தக்காரின்
ஈடில்லா அன்பிற்கு
அடிமை யாவோம்!
முனைவர் பொறி. மு. பொன்னவைக்கோ
Comments
Post a Comment